Almaty ákimi Baýyrjan Baıbek kópbalaly analarmen kezdesti. Analardyń barlyq suraqtary men usynystaryn tyńdaǵan ákim megapolıstegi turmysy tómen kópbalaly otbasylarǵa qoldaý kórsetý úshin qalalyq deńgeıde atqarylatyn áleýmettik sharalardy keńinen túsindirdi.
Buǵan deıin mundaı kezdesýler qalanyń barlyq aýdandarynda ótken bolatyn. Basqosý barysynda kópbalaly analardy áleýmettik járdemaqy mólsherin arttyrý, turǵyn úı men turmystyq jaǵdaıdy jaqsartý, eńbekpen qamtý, balalardy bala baqshaǵa ornalastyrý jaǵdaılary tolǵandyratyny aıtyldy.
«Memleket basshysynyń tapsyrmasy boıynsha úkimettik top jumys isteýde, kezdesýlerde aıtylǵan barlyq usynystar saralanady jáne esepke alynady. Bulardan ózge, biz qalalyq deńgeıde kópbalaly analarǵa qoldaý kórsetýdiń naqtyly mehanızmi jınaqtalǵan pármendi sharalardy «Nur Otan» partııasynyń kezekten tys konferensııasynda ashyp aıttyq. Mysaly, kámeletke tolmaǵan 4 jáne odan da kóp balalary bar turmysy tómen otbasylarǵa turǵyn úı alýdyń alǵashqy jarnasynyń tólemin sýbsıdııalaý múmkindigi qarastyrylatyn bolady», – dedi Baýyrjan Baıbek.
Turmysy tómen kópbalaly otbasylarǵa qoldaý kórsetýdiń keshendi sharalary boıynsha múgedek balany úıde oqytýǵa ketetin shyǵynnyń ornyn toltyrý úshin beriletin adrestik kómek pen qıyn ómirlik jaǵdaı týyndaǵan kezde bir ret kórsetiletin áleýmettik kómek kólemin arttyrý josparlanǵanyn atap ótýge bolady.
Aıta keterligi, shahar basshysy buryndary turmysy tómen kópbalaly otbasylardyń ekinshi balasynan bastap bala baqsha shyǵynyna ótemaqy tóleýdi qarastyrýdy tapsyrǵan bolatyn. Kópbalaly otbasylardyń kommýnaldy qyzmetke, sýmen qamtýǵa qatysty ystyq jáne sýyq sý eseptegish qondyrǵylaryn ornatýǵa ketken shyǵyndaryna jumsalatyn adrestik kómek kólemi de nazarǵa alynbaq.
Kópbalaly otbasylardyń zańnamalyq jáne psıhologııalyq keńesterge zárý ekeni eskerilip, taıaý arada «Baqytty otbasy» qalalyq jobasy iske aspaq. Sondaı-aq shaharda kópbalaly analar ortalyǵy qurylatyn bolady. Bir tereze qaǵıdasy boıynsha jumys isteıtin servıstik ortalyq arqyly kópbalaly analardy jumysqa tartý isi qolǵa alynbaq.
Almaty ákimdigi turmysy tómen otbasylar úshin áleýmettik jumys oryndaryn ulǵaıtý jáne stıpendııa beriletin tegin qysqa merzimdi kýrstar uıymdastyrý mumkindigin nazarǵa alyp otyr.
Osyǵan deıin Baýyrjan Baıbek negizsiz shyǵyndardan arylýdy usynǵan edi. Qala basshysy áleýmettik sıpaty bar sheshimder qabyldaý úshin Almaty ákimdiginiń «Nur Otan» partııasy fraksııasynyń múshelerimen birge bıýdjet shyǵyndaryn turaqty tekserip, ońtaılandyrý júrgizgenin aıtty. Nátıjesinde únemdelgen qarjy burynǵydaı azamattardyń ótinishi boıynsha áleýmettik máselelerge jumsalady. Olar – jańa jumys oryndaryn qurý, turmysy tómen jandarǵa, ásirese kópbalaly analarǵa qoldaý kórsetý spektrin ulǵaıtý, basqa áleýmettik sharalardy júzege asyrýdy kózdeıdi.
Arman OKTIаBR,
«Egemen Qazaqstan»
ALMATY